Gannover shahrida Germaniya hamda Gollandiya terma jamoalari o‘rtasidagi o‘tishi kerak bo‘lgan o‘rtoqlik o‘yini bekor qilindi.
Mahalliy politsiya stadion yaqinida shubhali buyum topgani haqida xabar paydo bo‘lgach, hududga maxsus bo‘linmalar yetib kelgan.
Bundan biroz oldinroq Gannover politsiyasi boshlig‘i Folker Kluve terakt uyushtirilishi rejalashtirilayotgani haqida aytib o‘tgandi.
O‘yinga bir necha soat qolganda stadiondan shubhali buyumlar topilgan. Natijada barcha eshiklar yopildi va stadionda evakuatsiya boshlandi.
«AVD-Arena» stadioniga yaqin bo‘lgan barcha ko‘chalarda nazorat kuchaytirilgan, stadionga kelayotgan futbolchilar avtobusi politsiya nazorati ostida xavfsiz hududga olib ketilgan.
Qayd etish kerakki, bu o‘yinni tomosha qilish uchun Germaniya kansleri Angela Merkel kelishi rejalashtirilgandi.
Hozircha, politsiya xodimlari rasman hech narsani ma'lum qilishmadi.
Eslatib o‘tamiz, 13 noyabr kuni Germaniya terma jamoasining Fransiya termasi bilan Parijda o‘tkazilgan o‘rtoqlik uchrashuvi vaqtida "Stad de Frans" stadioni atrofida portlash sodir etilgan. Shundan so‘ng, Germaniyaning Gollandiyaga qarshi o‘yini o‘tkazilishi ham so‘roq ostida qolgandi.
Parijdagi davomli teraktlar qurbonlari soni 129 nafar, jarohatlanganlar soni 352 nafar bo‘ldi. Shifoxonadagilarning 99 nafari og‘ir ahvolda qolmoqda.