Turkiya o‘zining raketaga qarshi mudofaa tizimi milliy loyihasini ishlab chiqishga qaror qilgani sababli qiymati 3,4 mlrd dollarlik raketaga qarshi mudofaa (RQM) tizimi uchun butlovchi qismlar ishlab chiqarishga tenderni bekor qilganini tasdiqladi. Bu haqda Turkiya Mudofaa vazirligining 17 noyabrdagi yozma bayonotida aytildi.
RQM tizimi uchun butlovchi qismlar xarid qilish bo‘yicha 4 mlrd dollarlik tender 2009 yilda e'lon qilingan edi. 2013 yil sentabrda 3,4 mlrd dollar taklif qilgan Xitoyning CPMIEC kompaniyasi tenderda g‘olib bo‘lgan. Xitoy kompaniyasidan tashqari tenderda AQShning Raytheon & Lockheed Martin konsorsiumi, Eurosam fransuz-italyan konserni va Rossiyaning “Rosoboroneksport” kompaniyalari vakillari ishtirok etishgan.
Xitoy kompaniyasi tender bo‘yicha raqobatchilaridan farqli, raketa majmualarining bir qismini Turkiyada ishlab chiqarish va bu texnologiyalarni Turkiyaga berish imkoniyatiga yo‘l qo‘ygan, biroq tomonlar Turkiyaning bu loyihadagi ishtiroki darajasi bo‘yicha yakuniy kelishuvga kela olmadilar. Bundan tashqari, Xitoy kompaniyasining tender g‘olibi bo‘lishi Turkiyaga uning NATO bo‘yicha ittifoqchilari tomonidan bosim o‘tkazilishini keltirib chiqardi.