O‘zbekistonliklarga Fransiyaning “San'at va adabiyot sohasidagi xizmatlari uchun” ordeni taqdim etildi

2015 yilning 9 noyabr kuni Fransiyaning O‘zbekistondagi elchixonasidagi qabul marosimida elchi Jak-Anri Els Fransiya madaniyat va kommunikatsiyalar vaziri Flyor Pelleren nomidan O‘zbekistonning ikki fuqarosiga “San'at va adabiyot sohasidagi xizmatlari uchun” ordeni kavalerining belgilari bilan mukofotladi.

Restavratsiya sohasiga ixtisoslashgan me'mor Zoirsho Qilichev “Buyuk Ipak yo‘lidagi karvonsaroylar” Fransiya-O‘zbekiston uyushmasining asoschilaridan biridir. Bu uyushma Buxorodagi bir madrasa va ikki karvonsaroyni restavratsiya qilgan.
Toshkent arxitektura-qurilish institutining sobiq rektori Tolib Nizomov Versal oliy arxitektura milliy maktabi bilan aloqalarni yo‘lga qo‘yib, hamkorlik doirasida talabalar va o‘qituvchilar almashishni amalga oshirgan arboblardan biridir.

Orden Fransiya va boshqa davlatlar fuqarolariga san'at va adabiyotni rivojlantirish yo‘lidagi xizmatlar uchun topshiriladi. Bugungi kunga qadar bu mukofotga O‘zbekistonning ikki fuqarosi sazovor bo‘lgan edi – Natalya Musina va Marinika Babanazarova.