Bojxona boshqarmasi xodimlari tomonidan huquqni muhofaza qiluvchi boshqa idoralar vakillari bilan hamkorlikda viloyat hududida qo‘lbola usulda kontrafakt alkogolli ichimliklar tayyorlashga mo‘ljallangan yashirin sexlar faoliyati fosh qilindi.
Jumladan, Oqtosh tumanida o‘tkazilgan hamkorlikdagi tadbir davomida mazkur tumanda istiqomat qiluvchi fuqaro V.Yakubovning xonadoni amaldagi tartiblarga muvofiq xolislar ishtirokida ko‘zdan kechirilganda, xonadon yerto‘lasida qo‘lbola usulda tayyorlangan aroqlarni qadoqlashga mo‘ljallangan vositalar, shu jumladan 943 dona muqaddam ishlatilgan butilka metall va plastmassa qopqoqlari, 50 dona butilka qopqog‘iga o‘raladigan polietilen qoplamalar, 85 dona bir xil seriya raqamiga ega soxta aksiz markalar borligi aniqlandi. Jumladan, bu sexda Jack Daniel's viskisi tayyorlangan.
Kattaqo‘rg‘on tumanida istiqomat qiluvchi S.Alimovaning xonadoni ko‘zdan kechirilganda esa, bu yerda 85 litrdan ortiq 2 turdagi 190 shisha kontrafakt aroqlar qonunga zid ravishda saqlanayotganini aniqlandi.
Samarqand shahrida aniqlangan yana bir holatda fuqaro M.Umarovning xonadonida bojxona rasmiylashtiruvini tasdiqlovchi hujjatlari bo‘lmagan 17 litrdan ortiq 2 turdagi 22 dona kontrafakt viskilar qonunga xilof ravshida saqlanayotgani fosh etildi.
Mazkur holatda xorijiy ishlab chiqaruvchilarga tegishli taniqli brendlarning soxtalashtirilganiga guvoh bo‘lish mumkin.
Hozirda yuqoridagi holatlar yuzasidan bojxona tekshiruvlari va surishtiruv harakatlari davom ettirilmoqda, deb xabar qiladi Bojxona qo‘mitasining axborot xizmati.
Ma'lum qilinishicha, 2015 yilning o‘tgan davri mobaynida Samarqand viloyati bojxona boshqarmasi xodimlari tomonidan huquqni muhofaza qiluvchi boshqa idoralar vakillari bilan hamkorlikda aniqlangan shu kabi qonunbuzarlik holatlari natijasida 957 litr sifatsiz alkogolli ichimliklar ashyoviy dalil sifatida olib qo‘yilgan.