O‘zbekistonning Andijon viloyati aholisi 24 noyabr kuni kechki soat 21:45da o‘chog‘i Qirg‘iziston hududida bo‘lgan zilzila ta'sirini sezishgan.
"Toshkent" seysmologiya markazi ma'lumotiga ko‘ra, bu zilzila Andijonda 2 ball kuchlanishga ega bo‘lgan. Zilzila markazi Toshkentdan 350 km masofada bo‘lgani aytilgan.
Yevropa-o‘rtayerdengizi seysmologiya markazining ma'lum qilishicha, Bishkekdan 284 km, O‘shdan 57 km va O‘zgandan 39 km masofadagi bu zilzila kuchi 5 ballga yaqin bo‘lgan.
Eslatib o‘tamiz, so‘nggi kunlarda O‘zbekistonda episentri Qirg‘iziston va Afg‘onistonda bo‘lgan bir necha zilzilalar qayd etildi. Jumladan, Toshkentda 17 noyabr kuni 22:29 da 2,5—3 balli, 20 noyabr kuni 9:46 da esa 2 balli, 21 noyabr kuni 5:16 da 2 balli, 22 noyabr kuni soat 23:16 da 1—2 balli zilzilalar sezildi.
Biroz oldinroq, O‘zbekiston Fanlar akademiyasi Seysmologiya instituti direktori Sabriddin Xusomiddinov O‘zbekistonda 2015 yilning oxirigacha O‘zbekiston Favqulodda vaziyatlar vazirligi bilan hamkorlikda zilzilalar haqida tezkorlik bilan xabar berishga imkon beruvchi yer sirti kuchli harakatlari stansiyalari tarmog‘i yaratilishi haqida ma'lumot bergandi.