"Al-Qoida" va IShID terrorchi tashkilotlari o‘rtasida Somalidagi "Ash Shabob" ekstremistik guruhi ustidan nazorat o‘rnatish uchun kurash ketmoqda. Bu haqda Telegraph gazetasi yozgan.
Qayd etilishicha, IShID bir necha marta "Ash Shabob" jangarilariga maxsus videoroliklar jo‘natgan. Bunday roliklarda yosh somaliliklar IShID safiga qo‘shilish uchun da'vat qilingan. Bu vosita o‘z ta'sirini ko‘rsatmay qolmagan, biroz oldinroq "Ash Shabob"ning 2 qo‘mondoni IShIDga sadoqat izhor qilgan.
Somali prezidenti Xasan Shayx Maxmudning fikricha, bu somaliliklarning "yo‘ldan og‘ishganini" anglatadi. Prezident jangarilarni amnistiyadan foydalanishga chaqirgan.
Siyosiy tahlilchilarning fikricha, "Ash Shabob" jangarilarining IShIDga qo‘shilishi ularga "Al Qoida"dan ustunlikni ta'minlaydi. Ularning aytishicha, IShID shu yilning bahorida Nigeriya hududidagi "Boko Haram"ni o‘z ta'siri ostiga olgach, o‘z faoliyat doirasini kengaytirgandi.
Shu bilan birgalikda, "Ash Shabob"ning asosiy rahbarlaridan biri "Al Qoida"dan "yuz o‘girilmasligi"ni aytib o‘tgan. Qayd etish kerakki, "Al Qoida" "Ash Shabob"ni moliyaviy jihatdan ta'minlab keladi.
Ba'zi tahlilchilar esa, IShID va "Al Qoida" o‘rtasidagi raqobat Somalidagi "terrorizmning yo‘qolishi" jarayonini tezlashtiradi.
Biroz oldinroq, AQSh "Ash Shabob" yetakchisi haqidagi ma'lumot uchun mukofot e'lon qilgandi.