Toshkentda bugun, 26 noyabr kuni, inson huquqlari bo‘yicha “Inson huquq va manfaatlarining ishonchli himoyasini ta'minlash – mamlakatni demokratik yangilash va modernizatsiya qilishning eng muhim yo‘nalishi: O‘zbekiston tajribasi” mavzuidagi xalqaro konferensiya ish boshladi, deb yozmoqda "Gazeta.uz".
“Xalqaro forumni o‘tkazishdan ko‘zlangan maqsad nafaqat jamoatchilikni va xorijlik hamkorlarimizni O‘zbekistonda inson huquqlari bo‘yicha ahvol qandayligi borasida axborot berish, balki chet el ekspertlarining bu boradagi tajribasini ham olishdir”, - dedi tadbirni ochib bergan inson huquqlari bo‘yicha milliy markaz direktori Akmal Saidov.
Tadbirda turli mamlakatlar elchilari, xalqaro institutlar vakillari, shuningdek, O‘zbekiston parlamenti, davlat hokimiyati va boshqaruvi organlari vakillari, fuqarolik jamiyati namoyandalari ishtirok etmoqda.
“Bu o‘zgaruvchan dunyoda bag‘rikenglik va inson huquqlarini hurmat qilish asos prinsiplar hisoblanadi, - dedi BMTning O‘zbekistondagi doimiy vakili Stefan Prisner o‘z chiqishida. – Inson huquqlari rivojlangan davlatning eng muhim indikatorlaridan biridir”.
Konferentsiya ikki kun davom etadi. Unda inson huquqlari, sud-huquq tizimini demokratizatsiya va liberalizatsiya qilish singari masalalar ko‘rib chiqiladi.