Avstraliyalik mutaxassis Mirko Yyelichich Toshkentning "Lokomotiv" jamoasig bosh murabbiy sifatida tayinlandi. Bu haqda jamoa rasmiy saytida xabar berilgan.
"Joriy mavsum yakuniga yetganidan so‘ng “Lokomotiv” futbol klubi rahbariyati jamoamiz murabbiylar shtabida faoliyat yuritib kelgan Mirko Yyelichichni rasman bosh murabbiy etib tayinladi. Avstraliyalik mutaxassis jamoani bo‘lajak o‘yinlarga tayyorlaydi va klub natijalari natija uchun endilikda u javobgar bo‘ladi.
Mirko Yyelichich bungacha asosiy tarkib murabbiylar shtabida ishlab kelayotgandi. Endilikda yangi futbolchilar uning qaroriga ko‘ra tanlab olinadi. Yyelichichga murabbiylar shtabida Andrey Miklyayev yordam beradi. Darvozabonlar bilan esa odatdagidek Pyotr Gizimchuk ishlaydi.
Mavsum yakunlangach, ko‘pchilik “Lokomotiv”ga endi kim bosh murabbiy bo‘larkin deya qiziqib ko‘rgan, hatto bu borada ba'zi nomzodlar nomi ham ilgari surilgandi. Biroq klubimiz rahbariyati Mirko Yyelichiga ishonch bildirishini ta'kidladi.
Serb millatiga mansub mutaxassis ayni paytda uyida dam olmoqda. Uning 9 dekabr kuni Toshkentga qaytib kelishi kutilmoqda", deyiladi xabarda.
Eslatib o‘tamiz, 17 oktabr kuni Oliy Liga yakuniga hali 5 tur qolganida "Lokomotiv" Vadim Abramovni jamoa bosh murabbiyligidan bo‘shatgandi. Bunga jamoaning chempionatda qayd etayotgani natijalari rahbariyatni qoniqtirmagani sabab bo‘ldi.
Jamoa o‘tgan haftada yakunlangan Oliy Liga birinchiligida 74 ochko bilan ikkinchi o‘rinda qoldi. Birinchi o‘rinda esa 75 ochko to‘plagan "Paxtakor" jamoasi o‘rin egalladi.