Geyts va Tsukerberg toza energiya texnologiyalari bilan shug‘ullanadi

Jahonning bir qancha yirik kompaniyalari o‘z mablag‘i va harakatlarini ekologik toza energiya manbalari texnologiyalarini yaratish borasidagi ishlanmalar yo‘lida birlashtirishlarini ma'lum qildi.

Ushbu maqsadda birlashgan tijoratchi va biznesmenlar guruh Breakthrough Energy Coalition nomini oldi. Ishtirokchilar qatorida Facebook asoschisi Mark Tsukerberg, Microsoft asoschisi Bill Geyts, Amazon rahbari Jyeff Bezos, Alibaba Group asoschisi Jyek Ma, Virgin Group asoschisi Richard Brenson bor.

Dastlabki bosqichda guruh o‘z mablag‘larini elektr ishlab chiqarish, uni saqlash, yetkazish va ishlab chiqarish samaradorligini oshirishga sarflaydi. Keyinchalik ular innovatsion g‘oyalarni keng bozorga olib chiqa oladigan yirik investorlarni jalb qilishni rejalashtirmoqda.

Breakthrough Energy Coalition guruhining asosiy maqsadlaridan biri global isishni to‘xtatish va eng kambag‘al davlatlarni energiya bilan ta'minlashdir.