AQSh prezidenti Barak Obama "Bataklan" teatriga tashrif buyurdi va 13 noyabr kungi fojia qurbonlari xotirasiga hurmat bajo keltirdi. Bu haqda ABC News xabar tarqatdi.
Ayni vaqtda Parijda 29 noyabr kuni boshlangan Iqlimiy sammit munosabati bilan bo‘lib turgan Obama "Bataklan"ga Fransiya prezidenti Fransua Olland hamda shahar meri Anna Idalgo hamrohligida tashrif buyurgan.
Obama qurbonlarni xotirlash uchun maxsus barpo qilingan joyga oq gul qo‘ygan va engashib, boshini quyi solgan ko‘yi bir daqiqa davomida gullar va shamlarga tikilib turgan.
Bundan oldinroq, Ukraina prezidenti Pyotr Porshenko "Bataklan" fojiasi qurbonlari xotirasiga gul keltirgani ma'lum qilingandi.
13 noyabr kuni Parijda davomli teraktlar sodir etildi. Ularning eng qonlisi "Bataklan" teatrida yuz berdi. 3 nafar jangani konsert bo‘lib o‘tayotgan teatr zaliga bostirib kirib, odamlarni o‘qqa tutishi natijasida voqea joyida 89 kishi halok bo‘lgan. Shu vaqtda "Stad de Frans" va boshqa hududlardagi teraktlar tufayli jami 130 kishi halok bo‘lib, 351 kishi jarohatlangan.