O‘zbekiston FVV tabiiy is gazidan zaharlanish oldini olishga qaratilgan tadbirlar o‘tkazadi

26 noyabr kuni O‘zbekiston Milliy matbuot markazida aholi orasida tabiiy is gazi va ovqatdan zaharlanish, botulizm va boshqa bir qator yuqimli kasalliklarning oldini olishga qaratilgan profilaktik tadbirlar mavzusiga bag‘ishlangan matbuot anjumani o‘tkazildi.

Matbuot anjumani Favqulodda vaziyatlar vazirligi tomonidan tashkil etilib, unda Sog‘liqni saqlash vazirligi, “O‘ztransgaz” AK mutaxassislari hamda ommaviy axborot vositalari xodimlari ishtirok etishdi.

Mutaxassislar o‘z ma'ruzalarida kun tartibidagi masala yuzasidan respublikamizda sodir bo‘lishi mumkin bo‘lgan favqulodda vaziyatlarni oldini olishga qaratilgan profilaktik tadbirlar yuzasidan anjuman ishtirokchilariga atroflicha ma'lumot berishdi. Bu haqda O‘zbekiston FVV matbuot xizmati xabar bergan.

"Haqiqatdan ham qish mavsumida, ya'ni ob-havoning keskin pasayishi kuzatilganda aholi orasida isitish moslamalaridan foydalanish va konservalangan mahsulotlarga bo‘lgan ehtiyoji sezilarli darajada oshadi.

Ayni holatni inobatga oladigan bo‘lsak, matbuot anjumanida ko‘rib chiqilgan masala bugungi kunda naqadar dolzarb ekanligi, o‘z vaqtida aholiga xavfsizlik qoidalarini etkazish zarurligi va ogohlikka chaqirish muhimdir.

Mavsum oldidan mutaxassislar tomonidan joylarda bir qator amaliy tadbirlar amalga oshirilib kelinmoqda. Jumladan, nostandart, xavfsizlik talablariga javob bermaydigan isitish moslamalarini keng tarqalishini oldini olish maqsadida o‘tkazilgan o‘rganish ishlarida 1934 ta holat aniqlangan va bartaraf etilgan.

Bundan tashqari, ovqatdan zaharlanish holatlarini oldini olish maqsadida bozorlar va ommaviy ovqatlanish joylarida, davolash va o‘quv muassasalarida jami 16640 marotoba davra suhbatlari, uchrashuvlar va tushuntirish ishlari o‘tkazilgan.

Bu yo‘nalishda olib borilayotgan ishlarning samarasini oshirish uchun muntazam ravishda ommaviy axborot vositalari orqali chiqishlar tashkil etilib, bevosita aholi bilan muloqot davomida 271 mingdan ortiq eslatmalar tarqatilgan", deyiladi xabarda.

Anjuman o‘ziga xos jonli tarzda bo‘lib o‘tdi va jurnalistlar o‘zlarini qiziqtirgan barcha savollarga mutaxassislardan javob olishdi.