1 dekabr kuni Milliy matbuot markazida O‘zbekiston Kasaba uyushmalari federatsiyasi tomonidan “Keksalarni e'zozlash yili” Davlat dasturi ijrosi doirasida amalga oshirilgan ishlarga bag‘ishlangan matbuot anjumani bo‘lib o‘tdi. Bu haqda UzA xabar bergan.
O‘zbekiston Kasaba uyushmalari federatsiyasi kengashi raisi T.Norboyeva va boshqalar prezident Islom Karimov rahnamoligida yoshi ulug‘ insonlarga hurmat-ehtirom ko‘rsatish, ularni aniq manzilli ijtimoiy himoyalash, turmush darajasi va sifatini yuksaltirish borasida keng ko‘lamli ishlar amalga oshirilayotganini ta'kidladi.
«Keksalarni e'zozlash yili» Davlat dasturiga muvofiq jamoat tashkiloti keksalar, nogironlar va aholining boshqa toifalari uchun ijtimoiy xizmatlarga oid qonun va boshqa qator hujjatlar loyihalariga takliflar kiritishda faol qatnashdi.
Dastur doirasida jamoat tashkilotining ishonch telefoni orqali 150 dan ortiq faxriyga bepul huquqiy maslahat berildi. Xotira va qadrlash kuni munosabati bilan turli vazirlik va idoralarda mehnat qilgan 1941-1945 yillardagi urush faxriylariga 300 ming so‘mdan pul mukofotlari topshirildi.
Ehtiyojmand va yolg‘iz keksalarga oziq-ovqat mahsulotlari, dori-darmonlar ajratish, uy-joylarini ta'mirlash, kommunal to‘lovlariga ko‘maklashish maqsadida 7 milliard 750 million so‘mga yaqin moddiy yordam ko‘rsatildi. Kam ta'minlangan faxriylarga kir yuvish mashinasi, mikroto‘lqinli pech va boshqa elektr-ro‘zg‘or jihozlari tuhfa etildi.
Tizimdagi 15 sihatgohda katta hajmdagi qurilish-rekonstruksiya ishlari bajarildi. Joriy yilning 1 dekabrigacha Kasaba uyushmalari federatsiyasi hamda vazirlik va idoralarga qarashli 36 sanatoriy-sog‘lomlashtirish maskanida qariyb 11,5 ming otaxon va onaxon sog‘lomlashtirildi.
Dastur doirasida otaxon va onaxonlarning qadimiy shaharlarimiz, madaniyat va ma'rifat maskanlariga sayohatlari tashkil etildi. Davlat dasturi ijrosi uchun O‘zbekiston Kasaba uyushmalari federatsiyasi kengashi tomonidan 73 milliard so‘m mablag‘ yo‘naltirilgani keksalarga hurmat ko‘rsatish mazkur jamoat tashkiloti faoliyatida ustuvor o‘rin tutganini ko‘rsatadi.