Chexiyadagi avtomobil ehtiyot qismlari ishlab chiqariluvchi zavodda portlash sodir bo‘ldi

Chexiyaning Turnov shahridagi avtomobil ehtiyot qismlari ishlab chiqariluvchi zavodda gaz tufayli portlash sodir bo‘ldi. Bu haqda Ceske Noviny xabar bergan.

"Zavod xodimlarining 5 nafari shikastlangan, ulardan 3 nafarining ahvoli og‘ir. Yana bir kishi bedarak ketgan", deydi qutqaruvchi xizmat xodimi.

Xabarda aytilishicha, zavod ishchilarining barchasi evakuatsiya qilingan, atrofdagi ko‘chalar to‘sib qo‘yilgan.

Mutaxassislar yangi portlashlar sodir bo‘lishi ehtimolini istisno qilishmagan.

Voqea joyiga o‘t o‘chiruvchi va qutqaruvchi xizmatlarning 14 guruhi ish olib bormoqda.