O‘zbekiston terma jamoasi fevral oyida Turkiyada o‘tkazishni rejalashtirgan yig‘inni xavfsizlik tufayli bekor qilgan. Bu haqda Moldfootball.com xabariga asoslanib, std.uz xabar tarqatgan.
O‘zbekiston futbol federatsiyasi matbuot xizmati esa hozircha bu haqda ma'lum qilmagan.
O‘zbekiston terma jamoasi Antaliyadagi yig‘in davomida Moldova bilan o‘rtoqlik uchrashuvi o‘tkazishni rejalashtirgandi. Endilikda bu o‘rtoqlik o‘yini Turkiyada emas, BAAda o‘tkazilishi mumkin.
«O‘zbekiston futbol federatsiyasi faks yo‘llab, xavfsizlik tufayli Turkiyadagi yig‘inini bekor qilganini ma'lum qildi hamda o‘rtoqlik o‘yinini 9 fevral kuni Dubayda o‘tkazishni taklif qildi. Moldova futbol federatsiyasi hozirda BAAda o‘ynash uchun ikkinchi raqib qidirmoqda. Agar topilsa, terma jamoa Dubayda yig‘in tashkil qiladi», – deya xabar qilgan Moldova futbol federatsiyasi vitse-prezidenti Ion Testimitsanu.
Eslatib o‘tamiz, O‘FF rasmiy sayti 25 noyabr kuni Moldova va O‘zbekiston terma jamoalari o‘rtasida 2016 yilning 9 fevral sanasida, Turkiyaning Antaliya shahrida o‘rtoqlik uchrashuvi bo‘lib o‘tishi haqida xabar bergandi.
Biroz oldinroq esa, terma jamoalar markazi direktori Asqar Tolibjonov Moldova bilan o‘rtoqlik uchrashuvi haqidagi xabar asossiz ekanligini aytgandi.