Turkiya Transanatoliy (TANAP) gaz quvuri bo‘yicha Ozarbayjondan gaz sotib olish hajmini ko‘paytirish imkonini ko‘rib chiqishi mumkin. Reuters axborot agentligining ma'lum qilishicha, bu haqda Turkiya bosh vaziri Axmet Dovudo‘g‘lu aytib o‘tdi.
Kuni-kecha Turkiya va Ozarbayjon Turkiya va Yevropaga Ozarbayjon gazini yetkazishga mo‘ljallangan TANAP loyihasini 2018 yildan avval tugatishga kelishib olgani ma'lum bo‘lgandi. Avvalroq Turkiyaga ushbu gaz quvuri bo‘yicha yiliga 6 mlrd kub metr gaz yetkazib berilishi ma'lum qilingandi.
TANAP loyihasi Ozarbayjonning “Shohdeniz” konidan Gruziya-Turkiya chegarasidan Turkiyaning g‘arbiy chegarasigacha gaz yetkazib berishni ko‘zda tutadi. Loyihaning umumiy qiymati 10 mlrd dolllarga baholanmoqda.
TANAP gaz quvurining dastlabki o‘tkazish qobiliyati yiliga 16 mlrd kub metr gazni tashkil qiladi. Bundan 6 mlrd kub metri Turkiyaga, qolgani Yevropaga yetkaziladi.
Turkiyaga 2018 yildan gaz yetkazib berilishi rejalashtirilmoqda, Transadriatik gaz quvuri qurilishi tugagach 2020 yildan Yevropaga ham gaz yetkazib berish boshlanadi.