Venesueladagi parlament saylovlarida muxolifat g‘alabani tantana qildi

Venesuelada 6 dekabr kuni o‘tkazilgan Milliy assambleya uchun parlament saylovida muxolifat kuchlari g‘alaba qildi.

Muxolif hisoblangan "Demokratik birlik davrasi" bloki saylov natijalariga ko‘ra parlamentdagi 167 o‘rindan 99tasiga egalik qilishi kutilmoqda.

Amaldagi "Yagona sotsialistik partiya" esa atigi 46 o‘rin olgan. Bu haqda Markaziy saylov komissiyasi rahbari Tibisay Lusena ma'lum qilgan.

Saylovda davomat 74,1 foizni tashkil etgan. Mamlakatda saylash huquqiga ega 19,4 million kishi yashaydi.

Shu tariqa avvaliga Ugo Chaves, keyin Nikolas Maduro rahbarligidagi sotsialistlar 17 yil ichida ilk marta saylovlarda mag‘lub bo‘ldi.

Saylovning dastlabki natijalar e'lon qilingach, odamlar Karakas ko‘chalariga chiqib, tantanani nishonlashgan.

Mamlakat prezidenti Nikolas Maduro o‘z partiyasi mag‘lubiyatini tan olgan.

Ma'lumot uchun, demokratlar yetakchisi Enrike Kapriles 2012 yilda Ugo Chaves vafot etgach, muddatidan oldin o‘tkazilgan prezidentlik sayloviga o‘z nomzodini qo‘ygan, lekin Chavesning o‘rinbosari Maduroga yutqazib qo‘ygandi.

Maduro davrida inflyatsiya darajasi saqlanib qolib, jinoyatchilik ko‘rsatkichlari o‘sdi. Bundan tashqari mamlakatning turli hududlarida oziq-ovqat tanqisligi kuzatildi.

Eslatib o‘tamiz, saylovlar arafasida muxolifat partiya yetakchilaridan biri Luis Manuel Dias noma'lum shaxslar tomonidan o‘ldirib ketilgandi.

Yangi tarkibdagi parlament 2016 yilning yanvaridan faoliyat boshlaydi va 5 yil muddatga tuziladi.