Rossiyaning “Silovyye mashiny” kompaniyasi Chorvoq gidroelektr stansiyasining uchinchi gidroagregati modernizatsiyasini yakunladi, deb xabar bermoqda Sputnik nashri muxbiriga “O‘zbekenergo” AJdagi manba.
Chorvoq GESning 4 ta gidroagregatini modernizatsiya qilish bo‘yicha shartnoma Rossiya kompaniyasi va “O‘zbekenergo”ning sho‘'ba korxonasi – “O‘rta-Chirchiq GES kaskadi” unitar korxonasi bilan 2011 yilda imzolangandi.
“Bugungi kunda Rossiya kompaniyasi 3-gidroagregatda barcha ishlarni yakunladi. Yaqin 2-3 kun ichida obektni ishga tushirish va elektr energiya olishni rejalashtirmoqdamiz”, deb aytdi manba.
Manbaning aytishicha, Rossiya yana bitta gidroagregatni mordernizatsiya qilishi kerak. Avvalroq Rossiya kompaniyasi 1- va 2-gidroagregatlardagi uskunalarning bir qismini almashtirib, har bir gidroagregatning quvvatini 15 megavattgacha oshirgandi.
Chorvoq GESini modernizatsiya qilish loyihasi 56,5 mln dollarga baholanmoqda. Bu loyihaning amalga oshirilishi GESning quvvatini 45 megavattga oshirishga imkon beradi hamda stansiyaning ishonchliligini oshiradi va ekspluatatsion ko‘rsatkichlarini yaxshilaydi.
Chorvoq GESining hozirgi kundagi quvvati 620 MVtni tashkil qiladi.