AFP: Iroq armiyasi Ramadi shahrini IShID jangarilaridan tozalashni boshladi

Iroq armiyasi 22 dekabr kuni Anbar viloyati markazi Ramadi shahrini IShID qo‘lidan ozod qilish bo‘yicha keng ko‘lamli harbiy amaliyot o‘tkazmoqda. Bu haqda Iroq xavfsizlik xizmatidagi manbasiga asoslangan holda Agence France-Presse agentligi xabar tarqatgan.

"Biz Ramadi shahriga bir necha yo‘llardan kirib, tumanlarni jangarilardan tozalashni boshladik", deya ma'lum qiladi manba.

20 dekabr kuni Iroq harbiylari mamlakat Harbiy havo kuchlari samolyotlari orqali Ramadi shahri ustidan varaqalar sochgan va aholini keyingi 3 kun davomida shahardan chiqib ketishga chaqirgandi.

"Al-Djazira" telekanalining bildirishicha, IShIDga qarshi amaliyot shaharda hali ham tinch aholi vakillari borligi uchun qiyinchilik bilan olib borilmoqda.