FIFA bosh kotibi lavozimidan ozod etilgan Jyerom Valke bir umrga futboldan chetlatilishi mumkin. Bu haqda Bloomberg xabar tarqatgan.
U sentabr oyida 90 kunga ishidan ozod etilgandi. Oktyabr oyi boshida FIFA uning futboldan chetlatilishi muddatiga yana 45 kun qo‘shilgani haqida ma'lum qildi.
U Braziliyada 2014 yili o‘tkazilgan mundial o‘yinlari uchun noqonuniy ravishda chipta sotishni tashkil qilganlikda ayblanishi mumkin. Bundan tashqari, uning 2010 yili JARda o‘tkazilgan jahon chempionati mezbonligini aniqlashda poraxo‘rlik ishida ishtirok etgani gumon qilinmoqda.
Bloomberg nashri ma'lumotiga ko‘ra, tergov ishlarini olib borayotgan shaxslar FIFAning etika bo‘yicha qo‘mitasiga 100dan ortiq sahifadan iborat hujjatlarni taqdim etgan. Unga ko‘ra, 55 yoshli fransiyalik amaldor bosh tashkilotning axloq kodekslarini bir necha marta buzgani qayd etilgan.
Ta'kidlanishicha, agar FIFA arbitraj palatasi ayblovlarni asosli deb topsa, Valke umrbodga futboldan chetlatiladi.
Eslatib o‘tamiz, 21 dekabr kuni FIFA prezidenti Yozef Blatter va UYeFA rahbari Mishel Platini 8 yil muddatga futbol bilan bog‘liq har qanday faoliyat turidan chetlatilgandi.