Yangi yil bayrami arafasida O‘zbekiston Respublikasi Ichki ishlar vazirligi tomonidan xavfsizlikni ta'minlash borasida zarur chora-tadbirlar amalga oshirilmoqda.
"Yangi yil bayrami ko‘ngildagidek o‘tishini ta'minlash borasida mamlakatimiz bo‘ylab keng ko‘lamli ishlar amalga oshirilmoqda. Ushbu yo‘nalishda tumanlar, mahallalar va korxonalarda hushyorlik va ogohlikka chorlovchi targ‘ibot tadbirlari tashkil etilmoqda. Bunday profilaktika ishlari muntazamlik kasb etgani tufayli odamlar ongida farzandini, o‘z uyini, mahallasini asrash, uni yomon ko‘zlardan, yovuz niyatli kimsalardan himoya qilish tuyg‘usi yanada mustahkamlanayotir", – deydi O‘zbekiston Respublikasi Ichki ishlar vazirligi inson huquqlarini himoya qilish va yuridik ta'minlash boshqarmasi boshlig‘i Ilhom Turg‘unov.
Ichki ishlar idoralari tizimida bayram kunlari tinchlik va xavfsizlikni ta'minlashga qaratilgan chora-tadbirlar tasdiqlangan reja asosida amalga oshirilmoqda. Bunda tegishli tashkilotlar bilan hamkorlikda jamoat tartibini saqlash, yo‘l harakati va yong‘in xavfsizligini ta'minlash hamda favqulodda vaziyatlarning oldini olishga alohida e'tibor qaratilmoqda.
O‘zbekistondagi har bir go‘sha, ayniqsa, bayram tadbirlari o‘tkaziladigan joylar soha xodimlarining alohida e'tiborida bo‘lib turibdi. Noxush holatlar yuzaga kelishiga yo‘l qo‘ymaslik, xavfsizlikni ta'minlash yuzasidan maxsus reydlar o‘tkazilmoqda. Bu jarayonda mahalliy hokimliklar, jamoat tashkilotlari vakillari, xususan, mahalla fuqarolar yig‘inlari raislari, posbonlar faol ishtirok etmoqda. Tadbirlar davomida aniqlanayotgan kamchiliklar, huquqbuzarliklar o‘z vaqtida bartaraf etilmoqda.
“Tozalash” tadbiri davomida yetti millionga yaqin obekt ko‘zdan kechirildi. Natijada 191 mingdan ortiq ma'muriy huquqbuzarlik aniqlandi. Jinoyat sodir etib qidiruvda yurgan shaxslar ushlandi", deyiladi O‘zA xabarida.
Yangi yil arafasida va bayram kunlari mamlakatimizga pirotexnika vositalari kirib kelishi va sotilishining oldini olish bo‘yicha ham zarur chora-tadbirlar ko‘rilmoqda.
Olib borilayotgan keng ko‘lamli sa'y-harakatlar natijasida yurtimizda jamoat xavfsizligi, osoyishtalik ta'minlanmoqda. Shunga qaramay, tinch, osoyishta hayotimizni asrab-avaylash har birimizdan ogoh va hushyor bo‘lishni talab etadi. Buni doimo yodda tutish, yaqinlashib kelayotgan Yangi yil bayrami ko‘ngildagidek o‘tishi uchun hissa qo‘shishga barchamiz mas'ul ekanimizni unutmaslik tavsiya etiladi.