Chiroqchi tumanida soliq yashirgan tadbirkor eng kam ish haqining 320 barobari miqdorida jarima to‘ladi

Qashqadaryo viloyatining Chiroqchi tumanida faoliyat yuritib kelgan tadbirkor moliyaviy jinoyatlari uchun javobgarlikka tortildi. Bu haqda “Huquq” nashri xabar bermoqda.
Mahmud Nigmatov asli Samarqand shahridan bo‘lib, 2014 yili Chiroqchida “Mahmud Invest” MChJni ro‘yxatdan o‘tkazgan.

Korxonaning 2014 yilning 1 aprelidan 2015 yilning 16 iyunigacha bo‘lgan faoliyati taftish qilinganida M. Nigmatov birlamchi buxgalteriya hujjatlarini taqdim qila olmagan. Tekshiruvlar natijasida ma'lum bo‘lishicha, shu davr ichida u 6.357 mlrd so‘mlik kirim qilinmagan tovarlarni ulgurji narxlarda sotib, davlat manfaatlariga jiddiy zarar keltirgan.

Bundan tashqari, ko‘rsatilgan davrda korxonaga kirim qilingan 13.879 mlrd so‘mlik tovar-moddiy boyliklarni pul o‘tkazish yo‘li bilan ulgurji narxlarda sotib olib, aholiga naqd pulga sotgan. Savdodan tushgan pullarni nazorat-kassa mashinasi orqali kirim qilmagan, bankka ham topshirmagan.

Mahmud Nigmatovga nisbatan JKning tegishli moddalariga asosan tayinlangan jazolarni qisman qo‘shish yo‘li bilan jinoyatlar majmui tariqasida eng kam oylik ish haqining 320 barobari miqdorida jarima jazosi tayinlandi. Shuningdek, avval o‘talmay qolgan muayyan huquqdan mahrum qilish qo‘shimcha jazosini qo‘shib, 1 yil 4 oyga mansabdorlik va moddiy javobgarlik vazifalarida ishlash huquqidan mahrum qildi.