Estoniya fuqaroligiga ega bo‘lmaganlarning mamlakatda tug‘ilgan bolalariga fuqarolik beriladigan bo‘ldi

2016 yilning 1 yanvaridan Estoniya qonunchiligiga yangi o‘zgartirish kiritildi. Unga muvofiq, Estoniya hududida yashovchi mamlakat fuqaroligiga ega bo‘lmaganlarning Estoniyada tug‘iladigan bolalari shu mamlakat fuqaroligiga ega bo‘ladi. Bu haqda “Interfaks” xabar bermoqda.

«Estoniya fuqaroligiga ega bo‘lmagan, ammo mamlakatda uzoq muddat istiqomat qilib kelayotganlarning yangi tug‘ilgan bolalariga Estoniya fuqaroligining berilishi insonparvarlikdan nishonadir», — deb ta'kidladi Estoniya IIV rahbari Xanno Pekura.

Uning ishonch bildirishicha, ushbu tuzatishlar mamlakat fuqarolik siyosatiga mutlaqo ta'sir ko‘rsatmaydi.

Uning ma'lum qilishicha, bolalar 21 yoshgacha ikkinchi fuqarolikka ega bo‘lib turishlari mumkin, ammo undan keyin ulardan birini tanlashlari kerak bo‘ladi.