Islom Karimov: O‘zbekiston iqtisodiyotidagi o‘sish 2016 yilda 7,8 foizga teng bo‘ladi

2016 yil kirib kelishi munosabati bilan O‘zbekiston Respublikasi Prezidenti Islom Karimov O‘zbekiston xalqiga Yangi yil tabrigini yo‘lladi. Prezidentning bayram tabrigi O‘zbekistonning barcha markaziy telekanallari orqali o‘qib eshittirildi.

Prezident o‘z tabrigida kirib kelayotgan 2016 yil 2015 yilga qaraganda kam bo‘lmasdan, xosiyatli va samarali bo‘lishiga ishonch bildirgan.

O‘zbekiston hukumatining prognoz va hisob-kitoblarida ko‘rsatilishicha, kirib kelayotgan 2016 yilda iqtisodiyotning o‘sish sur'atlari 7,8 foizga, aholining jon boshiga to‘g‘ri keladigan real daromadlari 9,5 foizga, ish haqi, pensiya, stipendiya va nafaqalarning miqdori turli manbalar hisobidan 15 foizga oshishi kutilmoqda.

Uning so‘zlariga ko‘ra, 2016 yilda davlat byudjyetida ilmu fan, ta'lim-tarbiya, sog‘liqni saqlash, madaniyat, sport tarmoqlarini o‘zida mujassam etgan ijtimoiy sohani rivojlantirishga sarflanadigan mablag‘lar 2015 yilda o‘zlashtirilgan mablag‘larga nisbatan ancha ko‘proq bo‘lib, davlat byudjyeti umumiy xarajatlarining 59,1 foizini tashkil etadi.

"Kirib kelayotgan yilda barcha moliyaviy manbalar hisobidan iqtisodiyotimizga 17 milliard 310 million dollar miqdoridagi kapital qo‘yilmalar yo‘naltirilib, ularning 23,5 foizini chet el investitsiyalari tashkil etadi.

Bir so‘z bilan aytganda, yangi – 2016 yil ko‘pgina ko‘rsatkichlar bo‘yicha yakuniga yetayotgan 2015 yilga nisbatan kam bo‘lmasdan, balki ko‘p sohalarda undan ancha yuqori va ziyoda bo‘lishi mo‘ljallanmoqda.

2016 yilda umumiy qiymati 5 milliard 500 million dollar bo‘lgan 164 ta yirik ishlab chiqarish obektida qurilish ishlarini yakuniga yetkazish va ularni foydalanishga topshirish ko‘zda tutilmoqda.

Shular qatorida Tollimarjon issiqlik elektr stansiyasida har birining quvvati 450 megavatt bo‘lgan ikkita bug‘-gaz turbinasi, Angren issiqlik elektr stansiyasida 150 megavatt quvvatga ega bo‘lgan energiya bloki qurilishini nihoyasiga yetkazish, Olmaliq kon-metallurgiya kombinatida 70 ming tonna mis ishlab chiqaradigan metall eritish korxonasini barpo etish kabi o‘ta muhim loyihalar borligini ta'kidlash lozim.

2016 yilda xitoylik sheriklar yordamida Qamchiq dovonini kesib o‘tadigan 19 kilometrlik tunnel qurilishini tugatib, Farg‘ona vodiysini butun O‘zbekiston bilan bog‘laydigan temir yo‘l ishga tushirilishi, shuningdek, “Toshkent – Samarqand” tezyurar temir yo‘l qatnovining Buxorogacha yetib borishi belgilangan.

Ayni vaqtda “Jyeneral motors – O‘zbekiston” aksiyadorlik jamiyatida “T-250” modelidagi yengil avtomobillar ishlab chiqarishni o‘zlashtirish, Muborak gazni qayta ishlash zavodida yillik quvvati 80 ming tonna bo‘lgan oltingugurt granulalari tayyorlaydigan korxonani barpo etish rejalashtirilmoqda. Shuningdek, zamonaviy traktorlar, yangi rusumdagi mobil telefonlar, planshet kompyuterlari, noutbuklar, televizor va xolodilniklar, konditsionerlar hamda boshqa maishiy elektr texnika buyumlari, keng turdagi dori-darmon vositalari ishlab chiqaradigan quvvatlar ham foydalanishga topshiriladi.

Kelgusi yilda “O‘zbekiston havo yo‘llari” milliy aviakompaniyasi “Boing-787” havo laynerlarining eng zamonaviy avlodiga mansub ikkita yangi samolyot bilan ta'minlanishi mamlakatimiz fuqaro aviatsiyasi rivojini yangi bosqichga ko‘tarishga xizmat qiladi", deydi davlat rahbari.