Gari Nevill "Valensiya" bilan shartnomasi yakunlangach, murabbiylik qilmoqchi emas

O‘tgan yilning dekabr oyi boshida Ispaniyaning "Valensiya" jamoasiga bosh murabbiy sifatida olib kelingan angliyalik sobiq futbolchi Gari Nevill o‘zining kelajagi borasidagi savollarga javob berib o‘tdi. U 2016 yilning yozida "ko‘rshapalaklar" bilan shartnomasi yakunlangach, boshqa ish boshlashi mumkin.

"Hozir kelajakda aynan nima ish qilishimni aniq ayta olmayman. Lekin bu murabbiylik emas. Murabbiylikda muvaffaqiyatlarga erishish - mening bosh maqsadim emas. Vaqti kelib, "Valensiya"dan ish taklif qilishdi. Men bungacha bosma nashrda, televideniyeda, jamoa murabbiyi sifatida, terma jamoa murabbiyi yordamchisi sifatida va jamoa xo‘jayini sifatida faoliyat ko‘rsatdim. Bu kasblar menga tajriba to‘plashda yordam berdi. Yana vaqti keladiki, boshqa taklif chiqadi va men murabbiylikni tashlab, o‘sha ish bilan shug‘ullanaman", deya uning so‘zlarini keltiradi Sky Sports.