Bahrayn eronlik diplomatlarga o‘z hududini tark etish uchun 48 soat muhlat berdi

Bahrayn Eron bilan diplomatik aloqalarni uzdi. Bunga Eronda Saudiya Arabistonining elchixonasi va konsulligi binolariga uyushtirilgan hujumlar sabab bo‘ldi.

Reyter agentligining BNA agentligi xabariga asoslanib, ma'lum qilishicha, bahraynliklar eronlik diplomatlarga o‘z hududidan chiqib ketish uchun 48 soat muhlat berdi.

AR nashri xabariga ko‘ra, Bahrayn axborot vaziri Iso al-Hamadiy Eron bilan munosabatlarning uzilishini qo‘llab-quvvatlab chiqqan.

Eslatib o‘tamiz, 2 yanvar kuni Saudiya Arabistoni hukumati tomonidan 47 kishi, shu jumladan, taniqli shia targ‘ibotchisi Nimr an-Nimrning qatl etilganini e'lon qildi.

Tehrondagi Saudiya Arabistoni elchixonasi qarshisida hamda Eron shimoli-sharqidagi Mashhad shahrida norozilik namoyishlari bo‘lib o‘tdi.

3 yanvar kuni Saudiya Arabistoni Tashqi ishlar vaziri Odil al-Jubayr “Qirollik ichki ishlariga ochiqdan ochiq suqilgani, regionda dushmanchilik harakatlarini amalga oshirgani va Tehrondagi Qirollik elchixonasiga hujum uyushtirgani uchun” Eron bilan diplomatik aloqalar batamom uzilgani haqida e'lon qilgan edi.