Kim Chen In davrida KXDRdan Janubiy Koreyaga qochib o‘tuvchilar soni qisqardi

Bundan to‘rt yil muqaddam KXDR hokimiyati tepasiga Kim Chen In kelganidan so‘ng Janubiy Koreyaga qochib o‘tuvchi shimolliklar oqimi ikki marotabaga qisqardi. 4 yanvar kuni Seul e'lon qilgan hisobotda bu haqda so‘z boradi.

Koreya Respublikasining Milliy birlashuv ishlari bo‘yicha vazirligi ma'lumotlariga ko‘ra, 2015 yilda Xitoy va boshqa mamlakatlar orqali Janubiy Koreyaga Shimoliy Koreyaning 1277 nafar sobiq fuqarosi yetib kelishgan. Bu 2011 yildagi 2706 kishiga qaraganda 52,8 foiz kam demakdir.

Mazkur ko‘rsatkich Shimoliy Koreya hokimiyatiga otasi Kim Chen Irdan keyin ega chiqqan Kim Chen Inning hukmronligi boshlangan 2011 yildan so‘ng muntazam pasayib borgan. 

Janubiy Koreyaning Ryonhap agentligi ma'lumotiga ko‘ra, 2015 yilda KXDRdan qochib kelganlarning 80 foizi ayollardir. Bu esa shimollik ayollar uchun Xitoyda savdo va xizmat ko‘rsatish sohasida ish topishi osonroq ekanini anglatadi. Ular Xitoyda Janubiy Koreyaga yetib olishga yetadigan pulni ishlab topishadi.