AQSh boshchiligidagi koalitsiya zarbalari tufayli IShID neftdan oladigan daromadining 30 foizidan mahrum bo‘lgan

AQSh boshchiligidagi harbiy koalitsiya samolyotlari IShIDga qarshi yo‘llagan zarbalar tufayli jangarilar neftdan oladigan daromadining 30 foizlik qismini yo‘qotgan. Bu haqda koalitsiya matbuot xizmati rahbari Stiv Uorren ma'lumotiga asoslanib, Reyter agentligi xabar berdi.

Uning so‘zlariga ko‘ra, koalitsiya o‘z amaliyotlarini boshlaganidan buyon hududdagi IShIDning neft obektlariga 65 marta zarba bergan.

Uorrenning baholashicha, IShID koalitsiya amaliyotlari boshlanishidan oldin kuniga 45 ming barrel neft ishlab chiqargan. Ayni vaqtda esa bu ko‘rsatkich kuniga 34 ming barrelni tashkil etadi.

Bundan oldinroq, AQSh boshchiligidagi koalitsiya harakatlari IShIDni sezilarli darajada kuchsizlantirgani haqida ma'lum qilingandi.