Toshkentda mijozidan firibgarlik yo‘li bilan 4 ming dollar olgan folbin qo‘lga tushirildi

Toshkentda mijozidan firibgarlik yo‘li bilan 4 ming dollar olgan folbin qo‘lga tushirildi. Bu haqda “Na postu” gazetasi yozmoqda.

Aytilishicha, Sofya Marsovna Ramiullina uzoq yillar davomida qahva quyqasida fol ochib kelgan. Tabiiyki, u ochayotgan foliga, qilayotgan bashoratlariga o‘zi ham ishonmas, ammo sodda mijozlarini shu yo‘l bilan aldab ulardan, pul undirar edi.

Bir safar unga keksa Tatyana Vitalevna ismli ayol murojaat qilib, chet eldan kelgan qarindoshiga vaqtinchalik yashash ruxsatnomasi olishi lozimligini, shuningdek, kvartirasini o‘z nomiga o‘tkazish bilan bog‘liq muammolari borligini aytib, shu bo‘yicha fol ochishni iltimos qilgan.

Ramiullina uni turli yo‘llar bilan aldab, “yo‘lida to‘siqlar” borligiga ishontirgan va hokimiyatda “ishini hal qilib berish” bahonasida 4 ming dollar undirgan. Sodda ayol firibgarga bu pullarni keltirib bergan.

Bir necha oylardan so‘ng ham natijaga erisha olmagach, to‘g‘ri hokimiyatga borib, Sofya ismli ayoldan pul berib yuborganini aytgan. Bu so‘zlardan hayron bo‘lgan hokimiyat xodimlari unga tegishli idoralarga murojaat etishni tavsiya qilishgan.

Shunda aldanganini tushungan ayol militsiyaga murojaat etgan.
IIV xodimlari qallobni qo‘lga olib, sudga topshirdi.