Bild: Kyolndagi zo‘ravonlar ularni Merkel “taklif” qilganini aytishgan

Germaniyaning Kyoln shahrida Yangi yil kechasi ayollarga uyushtirilgan hujumlarda ishtirok etgan muhojirlar o‘z pasportlarini yirtib tashlab, politsiya ularni qo‘lga ololmasligini, chunki mamlakatga ular kansler Angela Merkel tomonidan taklif qilinganini aytishgan. Bu haqda Bild nashri yozmoqda.

Nashrning ta'kidlashicha, Kyoln sobori oldidagi maydon va shahar vokzali binosida sodir etilgan zo‘ravonliklar politsiyaning bu borada kuchsizligini ko‘rsatib bergan.

U yerda zo‘rlik va o‘g‘rilik sodir etgan muhojirlar narkotik va spirtli ichimliklar ta'sirida bo‘lib, olomonga qarata petardalar va shishalar uloqtirgan, ayollarning sumkalarini tortib olgan. Voqea joyida bo‘lgan politsiya xodimlari aholini maydondan evakuatsiya qilish qaroriga kelgan.

Ammo shundan so‘ng jinoyatchilar guruhlarga bo‘linib, shaharning turli chekkalarida zo‘ravonlik va talonchilikni davom ettirgan.Ta'kidlanishicha, muhojirlar huquq-tartibot organlariga nisbatan hurmatsizlik ko‘rsatib, ular bilan bahsga kirishishgan. Ayrimlari qo‘llaridagi vaqtinchalik guvohnomalarni yirtib tashlab, ertagayoq yangisini ololishini aytgan.