2015 yilda «O‘zfarmsanoat» AK tomonidan 67 turdagi yangi dori vositalari ishlab chiqarilgan

2015 yilda «O‘zfarmsanoat» aksiyadorlik kompaniyasi tarkibidagi 14ta korxona tomonidan 67 turdagi yangi dori vositalari ishlab chiqarilgan. Bu haqda tashkilot matbuot xizmati xabar tarqatmoqda.

Manbaga ko‘ra, jami bo‘lib 229,3 mlrd. so‘mdan oshiqroq, qariyb 5 mln. dona mahsulotlar ishlab chiqarilgan.

67 xil dori vositalarining 26 tasi farmakoterapevtik guruhiga, 20 dori preparat esa asosiy dori vositalari guruhiga kiradi.

Bundan tashqari, «Asia Trade» MChJ korxonasi umumiy miqdori 1 million donadan, qiymati 2 mlrd. so‘mdan ortiqroq bo‘lgan 7 turdagi tibbiyot mahsulotlarini ishlab chiqarishni boshladi.

Shuningdek, yana beshta tadbirkorlik sub'yektlarida 34 turdagi biologik faol qo‘shimchalar va o‘simlik choylari ishlab chiqarilishi yo‘lga qo‘yildi. Buning natijasida ushbu yo‘nalishda jami qiymati 956,2 mln. so‘m bo‘lgan 666,4 ming dona mahsulot ishlab chiqarildi.