Janubiy Koreya prezidenti mamlakatda yadro quroli yaratilishiga qarshi chiqdi

Janubiy Koreya o‘z yadro qurolini yaratmaydi va xalqaro hamjamiyat oldidagi majburiyatlarini bajaradi, deya ma'lum qildi mamlakat prezidenti Pak Kin Xe Seuldagi matbuot anjumani chog‘ida.

6 yanvar kuni Shimoliy Koreya AQShning tahdidlaridan himoyalanish uchun o‘z vodorod bombasini yaratganini ma'lum qilgan edi. Shu munosabat bilan ayrim janubiy koreyalik siyosatchilar Janubiy Koreya ham o‘zining yadro qurolini ishlab chiqishi kerak, degan da'vo bilan chiqishdi.

Bunday takliflarga qanday munosabat bildirishi to‘g‘risidagi savolga Pak Kin Xe: “ularni tushunaman”, deya javob berdi va Janubiy Koreyaning xalqaro hamjamiyat oldida majburiyatlari mavjudligini, ularni bajarish lozimligini ta'kidlab o‘tdi.

“Yadrosiz dunyo Koreya yarim orolidan boshlanishi kerak. Yarim orolda yadro quroli bo‘lmasligi lozim”, - dedi Pak Kin Xe. Shu bilan birga, u AQSh Janubiy Koreyani “yadroviy soyabon” bilan himoya qilishini ham aytib o‘tdi.

Bir necha kun muqaddam esa amerikaliklar 10 yanvar kuni Janubiy Koreyaga Tinch okeanining Guam orolidagi bazasida turgan atom bombasini tashiydigan V-52 bombardimonchisini joylashtirdi.