«Volfsburg» FIFA 16 o‘yinlari bo‘yicha vitse-chempion bilan shartnoma imzoladi

Germaniyaning «Volfsburg» klubi kibersport yo‘nalishidagi faoliyatini kengaytirganini e'lon qildi. Bu haqda klub rasmiy saytida xabar berilgan.

Klub FIFA 16 bo‘yicha ingliz geymeri Devid «DaveBtw» Bayzevey bilan shartnoma imzoladi. Bundan tashqari «Volfsburg» geymerlar uchun stullar yasab beruvchi NEEDforSEAT kompaniyasi bilan ham shartnoma imzolagan.

«Bu bu yo‘nalishda nemis klublari ichida yetakchi bo‘lishni istaymiz. Bizning maqsadimiz real va virtual futbol o‘rtasidagi bog‘liqlikni yana rivojlantirishdan iborat.

FIFA yildan yilga barchasini real futbolga o‘xshatib bormoqda va fanatlar hamda professional futbolchilar orasida ommalashib bormoqda», – deya ta'kidlagan «Volfsburg» sport direktori Klaus Allofs.

Oldinroq «Volfsburg» Benedikt «Salz0r» Saltser bilan shartnoma imzolagandi. U bir necha marotaba FIFA o‘yinida klub nomidan ishtirok etgan.

Tez orada ikkala kibersportchilar Go4Cup va Gfinity onlayn-chempionatlarida ishtirok etishadi. Saltser 22-24 yanvar kunlari Germaniyada bo‘lib o‘tadigan Dreamhack Leipzig musobaqasida ham ishtirok etishi ko‘zda tutilgan.

Qayd etib o‘tish joiz, Devid «DaveBtw» Bayzevey 1993 yilda Angliyada tug‘ilgan. FIFA (FIWC) ning 2014 yilda Rio-de-Janeyroda tashkil etilgan jahon chempionatida vitse-chempion unvonini qo‘lga kiritgandi.