AQShning IShIDga qarshi harbiy kampaniyasi xarajatlari 5,5 mlrd dollarni tashkil qildi

AQShning IShIDga qarshi harbiy kampaniyasi xarajatlari 2014 yil sentabridan 5,5 mlrd dollarni tashkil qilgan. Bu haqda Iroq va Suriyada aksilterrorchilik operatsiyasida ishtirok etayotgan AQSh qo‘shinlari guruhining rasmiy vakili Stiv Uorren ma'lum qildi. Uorren Bag‘doddan uyushtirilgan teleko‘prik yordamida Pentagon matbuot markazida yig‘ilgan jurnalistlar bilan matbuot anjumani o‘tkazdi.

“Terrorchilarga qarshi kurashga har kuni 11 mln dollar sarflanmoqda”, deb aytdi Uorren hamda operatsiya davomida AQSh harbiy samolyotlari 65492 ta jangovor parvoz amalga oshirgani va IShIDning pozitsiyalariga 9782 ta zarba berganini ma'lum qildi.

Bu zarbalardan uchdan ikki qismi Iroq hududiga, qolgani Suriya hududiga to‘g‘ri kelgan. Pentagon agar bir nechta samolyot bir vaqtda bir nishonga zarba bergan bo‘lsa, buni bitta zarba deb qabul qiladi. “2015 yil mayidan koalitsiya IShIDning yuqori va o‘rta bo‘g‘indagi 95 yetakchisini va bir necha ming oddiy jangarini yo‘q qilgan”, deb qo‘shimcha qildi Uorren.

AQSh jangarilarning Iroqdagi pozitsiyalarini 2014 yil 8 avgustidan, Suriyadagi pozitsiyalarini esa 23 sentabrdan boshlab bombardimon qilishni boshlagan. Iroqdagi jangovor harakatlarda AQSh aviatsiyasi bilan birga Avstraliya, Buyuk Britaniya, Iordaniya, Kanada, Niderlandiya va Fransiya, Suriyada esa Avstraliya, Bahrayn, Buyuk Britaniya, Iordaniya, Kanada, BAA, Saudiya Arabistoni, Turkiya va Fransiya samolyotlari ishtirok etmoqda.