Roberto Manchini: "Inter"da hujumchilar muammosi bor, boshqa hujumchi olishimiz kerak

"Inter" jamoasi bosh murabbiyi Roberto Manchini Italiya A seriyasining 21 turida "Karpi"ga qarshi kechgan uchrashuvidan (1:1) keyin o‘z fikrlari bilan o‘rtoqlashdi.

"Men natijadan juda xafaman. Uchinchi o‘yindirki, biz raqibga gol urish uchun o‘zimiz imkoniyat yaratib bermoqdamiz.

Yana bir jiddiy muammo shundaki, hujum chizig‘i vakillari gol ura olmay qolishdi. Hujumchilarimiz bitta joyda turib, to‘p kelishini kutib qolishmoqda. Axir futbol faqat muskullarga tayangan holda emas, aql ham ishlatiladigan o‘yin-ku!

Bugun bizda kamida 7ta golli vaziyat bo‘ldi. Lekin o‘yinga qo‘shib berilgan daqiqalarda himoyachilarimiz go‘yoki uxlab qolishdi va gol qo‘yib yubordik. Raqibga bunday imkon berish aqlga to‘g‘ri kelmaydi.

Ikardining golga aylantira olmagan vaziyatlari haqida so‘raysizmi? Men 50 yoshdaman, lekin shu holimda ham bu vaziyatda gol ura olgan bo‘lardim. Bunday nuqtadan gol ura olmaslikning o‘zi qiyin.

Hujumchilar shuni tushunishi kerakki, 92 daqiqaga qadar o‘ynashda davom etishlari kerak. To‘pga intilib, uni egallab, kerak bo‘lsa uni jamoada saqlab turish uchun raqib jarima maydoni yaqinidagi burchakka borib olish kerak. Futbolchi kallasini ishlatishi kerak. Menimcha, qishki transferlar yakunlanmasidan yangi hujumchi olamiz.

Shuningdek, "Inter" futbolchilari shuni bilib olishi kerakki, 1:0 hisobi juda qaltis hisob, raqib istalgan vaziyatda hisobni tenglashtirib qo‘yishi mumkin. Bugungi o‘yin ularga saboq bo‘lishi lozim.

Biz mavsumning birinchi davrasida qo‘lga kiritilgan g‘alabalarni havoga sovurgandekmiz", deya so‘zini yakunlagan Manchini.