Namangandagi “Hidoya” o‘rta maxsus islom bilim yurti yangi binoga ko‘chib o‘tdi

Namangan shahrida joylashgan “Hidoya” o‘rta maxsus islom bilim yurtining (sobiq “Mulla Qirg‘iz” madrasasi) yangi binoga ko‘chirish marosimi bo‘lib o‘tdi.

Mazkur marosimda Namangan shahri faxriylari, mahalla oqsoqollari, masjid imom-xatiblari ishtirok etishdi.

O‘zbekiston musulmonlari idorasi raisi, muftiy Usmonxon Alimov so‘zga chiqib, yig‘ilganlarga ushbu islom bilim yurtining tarixi hamda faoliyati haqida ma'lumot berib o‘tdi. Namangan viloyat vakilligi tomonidan O‘zbekiston musulmonlari idorasi rahbariyatidan madrasa binosini yangi, zamonaviy va barcha talablarga javob beradigan binoga ko‘chirish masalasi so‘ralgan edi. Hukumat tomonidan bu masala ijobiy hal etilgan.

Muftiy Namangan shahrining baland hududida joylashgan, xushhavo iqlimga ega bo‘lgan hamda barcha qulayliklari mavjud “Oromgoh” dahasidan madrasa uchun yangi majmua ajratilganini mamnuniyat bilan e'lon qildi.

Mazkur majmua bir necha binolardan iborat bo‘lib, unda zamonaviy o‘quv binosi, hamda barcha qulayliklarga ega bo‘lgan talabalar turar joyi ham mavjud. Shuningdek, bu yerda oshxona, namozxona, majlislar zali hamda viloyat vakilligi uchun ham maxsus binolar barpo qilingan.

Yangi majmuaning hududi 10 gektarga yaqin bo‘lib, bu yerda 10 mingdan ziyod mevali, 3 mingdan ziyod manzarali daraxt ekilgan.

Viloyatda faoliyat ko‘rsatayotgan masjidlar imom-xatiblarning yig‘ilishlari uchun mo‘ljallangan maxsus majlislar zali, ma'naviyat va ma'rifat xonalari, zamonaviy texnik jihozlar bilan ta'minlangan axborot-resurs markazlari tashkil etilgan. Majmua zamonaviy isitish va sovutish tizimiga ega.

Bunday ulkan majmuani tashkil etishdan maqsad bu maskanni kelajakda O‘zbekiston respublikasining diniy-ma'rifiy bilim markazlaridan biriga aylantirish hisoblanadi.

"Muftiy so‘zining oxirida Namangan ahlini ushbu xayrli ish bilan muborakbod etib, bu o‘quv yurtidan kelajakda nafaqat yurtimizda, balki dunyoga mashhur olim va ulamolar chiqishiga ishonch bildirdilar", deyiladi “Islom nuri” jurnalida.

Yig‘ilishda Namangan shahridagi “Bunyodkor” mahalla fuqarolar yig‘ini raisi Mamatvali Turg‘unov so‘z olib, ushbu yangilik Namangan ahlini juda quvontirganini ta'kidladi. Shuningdek, buning natijasida talabalar ko‘rkam, zamonaviy binolarda tahsil olishlari, xushmanzara joyning toza havolaridan bahramand bo‘lishlarini bildirib, bu ham mamlakat mustaqilligi sharofati hamda yurtda vijdon erkinligi ta'minlanganining amaldagi tasdig‘i ekanini alohida ta'kidladi.

Yig‘ilishda so‘zga chiqqan mehnat faxriysi Bositxon Abdurahimov o‘z hissiyotlarini quyidagicha ifodalagan: Biz keksalar bugungi yig‘ilishda yangi xabarni eshitib, bag‘oyat xursand bo‘ldik. Chunki talaba yoshlarimiz shahrimizning eng bohavo joyida joylashgan zamonaviy binoga ko‘chib o‘tmoqda. Oldinlari bizni farzandlarimiz ancha, diqqinafas joyda tahsil olayotgani tashvishga solar edi. Bugungi shod-xurramlik muhtaram Prezidentimizning, hukumatimizning yoshlarimizga ulkan g‘amxo‘rligi, Namangan tarixida katta ijobiy voqea hisoblanadi. Hukumatimiz tomonidan muqaddas dinimizga ko‘rsatilgan bu e'tibor, ayniqsa yoshlarimizning bilim olishlari uchun yaratib berilayotgan qulay shart-sharoitlar uchun biz cheksiz minnatdorchilik bildiramiz.

Yig‘ilishning barcha ishtirokchilari, jumladan, madrasa rahbariyati, o‘qituvchilari va talabalari tomonidan ham bilim yurtiga ko‘rsatilgan katta e'tibor va g‘amxo‘rlik uchun cheksiz minnatdorliklar bildirildi.

Ushbu quvonchli voqeani ommaviy axborot vositalarida yoritish, ertangi juma namozida viloyatning barcha masjidlarida namozxonlarga yetkazish zarurligi tayinlangan.