Kasyanov Ramzon Qodirovni "siyosiy adovat sababli o‘ldirish bilan tahdid qilishda" aybladi

Rossiya sobiq bosh vaziri va PARNAS rahbari Mixail Kasyanov feysbukda uni Ramzon Qodirov "snayper nishoni"ga olgan holda tasvirlagan videosiga izoh berdi.

"Buni siyosiy adovat sababli o‘ldirish bilan to‘g‘ridan-to‘g‘ri tahdid qilish, davlat va jamiyat arbobining hayotiga tajovuz, aholini qo‘rquvga soluvchi harakatni amalga oshirish istagini ommaviy ravishda bildirish deb baholayman", deb yozdi Kasyanov.

Kasyanovning aytishicha, Qodirovning "mamlakatda avj olayotgan o‘zgacha fikrlovchilarga qarshi kampaniya"dagi ishtiroki uchun Vladimir Putin ham javobgar.

Kasyanov huquq-tartibot muassasalariga "zaruriy shikoyat arizalarini" topshirmoqchi.

Kasyanovning e'tiroziga Ramzon Qodirovning instagramda Kasyanov "snayper nishoni"ga olingan holda tasvirlangan videoni chop etgani sabab bo‘ldi. Video "Kasyanov Strasburgga Rossiya muxolifati uchun atalgan pulga keldi" deb nomlangan. Qodirov videoga izohda "Kim tushunmagan bo‘lsa, tushunib oladi!" deb yozuv qoldirgan.