"Real" jamoasi bosh murabbiyi Zinedin Zidan Ispaniya chempionati 23-turida "Granada"ga qarshi kechgan (2:1) o‘yindan so‘ng matbuot anjumanida ishtirok etdi.
"Modrich ajoyib gol urdi va eng muhimi bizga qimmatli uch ochkoni olib keldi. U bugun ko‘rsatgan o‘yindan mamnunman. U darvoza tomon ko‘proq zarbalar berib turishi kerak, axir uning ajoyib va kuchli zarbasi bor.
O‘yin haqida to‘xtaladigan bo‘lsam, raqib yetarlicha muammolar tug‘dirdi. "Granada" himoyaviy uslubda harakatlandi, bu esa tabiiy hol. Qolaversa raqib maydonida o‘ynashning o‘ziga yarasha qiyinchiliklari bo‘ladi. Ammo har qanday hisobdagi g‘alaba qadrli. Bugungi 3 ochko biz uchun o‘ta muhim edi.
Bugun raqib futbolchilari qanchalik yaxshi o‘ynamasin, biznikilar ulardan yaxshiroq ekanliklarini ko‘rsatishdi. Mavsumning qolgan o‘yinlarida ham oson g‘alabalar bo‘lmasligi tayin", - deydi fransiyalik mutaxassis.