«Rayo Valekano» bosh murabbiyi: «Barselona»ga qarshi o‘yinda haqiqiy hakamni ko‘rmadim»

Ispaniyaning «Rayo Valekano» futbol klubi bosh murabbiyi Pako Xemes mamlakat chempionatining 27-turidan o‘rin olgan «Barselona»ga qarshi uchrashuvdan (1:5) keyin fikr bildira turib, hakamlikdan norozi bo‘lganini ta'kidladi.

«Biz 35 uchrashuvdan beri mag‘lubiyat nimaligini bilmay kelayotgan jamoaga qarshi o‘ynadik. Bizda yaxshi imkoniyatlar bo‘ldi, biroq hali bu borada ko‘p ishlashimiz kerak.

Men bugun maydonda hech qanday hakamni ko‘rganim yo‘q. «Barselona»dek jamoaga qarshi to‘qqiz kishi bo‘lib harakat qilish natijaga ta'sir o‘tkazadi. Bunday vaziyatda o‘ynash juda qiyin. O‘ylashimcha, to‘liq tarkib bilan o‘ynaganimizda hisob bu darajada ko‘rinish olmasdi», deya Xemesdan iqtibos keltiradi AS.