Davlat raqobat qo‘mitasi tomonidan Toshkentdagi ayrim restoranlarning reklamasi olib tashlandi

Davlat raqobat qo‘mitasi tomonidan ijtimoiy tarmoqlarda joylashtirilayotgan reklama axborotlari tahlil qilinganda, ayrim umumiy ovqatlanish korxonalari tomonidan o‘z xizmatlarini, xususan alkogol mahsulotlari reklamasi va targ‘ibotiga yo‘l qo‘yilganligi kuzatildi.

Jumladan, Toshkent shahridagi ayrim restoranlar tomonidan joylashtirilgan reklamalarga barham berilib, ularga nisbatan qonunchilikda belgilangan tartibda choralar kurilgan.

Ma'lumot uchun: O‘zbekiston Respublikasi “Reklama to‘g‘risida”gi qonunining 23-moddasiga asosan, tamaki, tamaki mahsulotlari va har qanday quvvatdagi alkogolli ichimliklar reklamasi taqiqlanadi.

Shuningdek, “Alkogol va tamaki mahsulotlarining tarqatilishi hamda iste'mol qilinishini cheklash to‘g‘risida”gi qonunning 18-moddasiga muvofiq, alkogol va tamaki mahsulotlarini reklama qilishga yo‘l qo‘yilmaydi hamda alkogol va tamaki mahsulotlarini iste'mol qilishni targ‘ib etish, ya'ni alkogol va tamaki mahsulotlari iste'mol qilishni rag‘batlantiruvchi, shaxsda ularni iste'mol qilishning zararsizligi haqidagi tasavvurni shakllantiruvchi g‘oyalar, qarashlar hamda badiiy obrazlarni oshkora yoki yashirin shaklda tarqatishga qaratilgan xatti-harakatlar taqiqlanadi.
Ushbu nazorat tadbirlari davom etirilmokda.