O‘zbekistondagi Britaniya Kengashi, O‘zbekistondagi Yevropa Ittifoqi Delegatsiyasi hamda Britaniyaning O‘zbekistondagi Elchixonasi tabiatning go‘zal in'omlariga bag‘ishlangan tanlov e'lon qiladi. Bu haqda elchixona matbuot xizmati xabar bermoqda.
Tanlov bir oy davom etib, g‘oliblar 22 aprel kuni Xalqaro Yer Kuni munosabati bilan taqdirlanishadi.
Tanlov shartlari:
— O‘zbekistonning noyob hayvon, o‘simligi yoki tabiat manzaralari fotosuratini oling;
— Fotosuratga qisqacha ta'rif bering (ta'rifda noyob hayvon/o‘simlik/ tabiat manzarasi nomi va uning o‘ziga xos xususiyatini yozing)
— Foto suratni va unga bo‘lgan ta'rifni O‘zbekistondagi Britaniya Kengashining Facebookdagi sahifasiga yoki o‘zingizning instagram sahifangizda #GreenUz heshtegi bilan joylang.
Fotosuratlar 2016 yil 19 aprel, soat 09:00 ga qadar qabul qilinadi. Natijalar 2016 yil 21 aprel kuni e'lon qilinadi. Hakamlar hay'ati tomonidan eng yaxshi, deb topilgan fotosurat muallifi planshet, 10ta qiziqarli surat egasi esa tashkilotchilar tomonidan turli xil esdalik sovg‘alari bilan taqdirlanadilar.
Bir ishtirokchi faqatgina bitta fotosurat jo‘natishi mumkin. Surat ishtirokchining muallifligi ostida bo‘lishi lozim. O‘zga mualliflarning suratini ishlatgan ishtirokchi tanlovdan chetlashtiriladi. Hakamlar hay'ati ijodiy yondashilgan va qiziqarli suratlarga alohida e'tibor beradi!