BAAda avtobus haydovchisi yo‘lovchiga unutib qoldirilgan 15 ming dollarni qaytarib berdi

Dubay xalqaro aeroportidagi avtobus haydovchisi yo‘lovchiga unutib qoldirilgan sumkasini qaytardi, uning ichida hujjatlar va 15 ming dollar pul bo‘lgan. Gulf News gazetasining xabar berishicha, transport xizmati xodimi to‘g‘ri niyatli harakati uchun rahbariyat tahsiniga hamda minnatdor yo‘lovchidan 800 dollar pul mukofotiga sazovor bo‘ldi.

Asli pokistonlik bo‘lgan Zohid Ali avtobus salonini tartibga keltirayotganida sumkani ko‘rib qolgan. U topilmani aeroport politsiyasiga yetkazib bergan, ular esa egasini topib topshirishgan. Bu haydovchining mehnat faoliyati davomidagi uchinchi, biroq mukofot olgan birinchi holat bo‘ldi.

"Men mukofotga umid qilmagandim va dastlab undan bosh tortdim, - deydi haydovchi jurnalistlarga. - Ammo xitoylik tadbirkor o‘z so‘zida turib oldi va men rozi bo‘ldim".
Insofli haydovchi hikoyasi kutilmaganda keng omma orasida mashhur bo‘lib ketdi. Unga xususiy muassasalardan qilgan xayrli amali uchun ketma-ket sovg‘alar kelib tusha boshladi.

Gulf News nashrining ma'lum qilishicha, to‘rt yillik haydovchilik faoliyati davomida Zohid Ali yo‘lovchilarga jami 25 ming dollar qiymatdagi pullarini qaytargan. Biroq biror marta birovning omonatiga xiyonat qilmagan va aynan mana shu jihati oddiy haydovchini Birlashgan Arab Amirligidagi eng mashhur insonlardan biriga aylantirdi.