Xorijiy OAVda Gollivudning eng mashhur aktyorlaridan biri Xarrison Fordga o‘z rafiqasini do‘pposlash aybi qo‘yilgani haqidagi ma'lumotlar paydo bo‘ldi. Biroq keyinroq aniqlanishicha, aktyor xatolik tufayli Kaliforniyadagi Xantington-Bich shahri politsiyasi ma'lumotlar bazasiga tushib qolgan.
Aniqlanishicha, "Yulduzlar janglari" filmidagi Xan Solo rolining mashhur ijrochisi ismi va pasporti raqamini ma'lumotlar bazasiga amaliyot o‘tayotgan politsiyachi mashg‘ulotlar vaqtida kiritgan. Politsiyachi ma'lumotlarni kiritish shaklini biror bir ma'lumotlar bilan to‘ldirib, keyin ularni o‘chirib tashlashi kerak bo‘lgan. Biroq u ma'lumotlarni kiritishga kiritganu, ularni nimagadir o‘chirmagan. Oqibatda soxta ma'lumot haqiqatga aylanib ketgan.
Bu orada huquq-tartibot muassasalari bu ma'lumotga tayanib, Fordning hibsga olinishiga order yozishga ham ulgurishgan. Biroq ish bungacha bormadi, deb xabar bermoqda TMZ nashri.
"Yulduzlar janglari"ning boshqa bir yulduzida haqiqatda ham qonun bilan haqiqiy muammolar vujudga keldi. Filmning 1999 yilda chiqarilgan qismida Enakin Skayuokerning yoshligini ijro etgan 27 yoshli Jyeyk Lloyd avtomobilda tezlikni oshirgani va politsiyaning to‘xtash haqidagi talabini bajarmagani uchun panjara ostiga tushdi. Unga shizofreniya tashxisi qo‘yilib, psixiatrik shifoxonaga davolanish uchun o‘tkazilgan.