Butrageno: «Siti» oson raqibmi? O‘tgan yili ham «Real»ning omadi kelib «Yuventus» bilan tushgani haqida aytishgandi

Madridning «Real» jamoasining jamoatchilik bilan aloqalar bo‘limi direktori, sobiq futbolchi Emilio Butrageno YeChLning yarim finalida yetarlicha kuchli bo‘lgan jamoaga qarshi o‘ynashiga to‘g‘ri kelishini aytdi. Biroz oldinroq o‘tkazilgan qur'a natijasiga ko‘ra, «Qirollik klubi» Angliyaning «Manchester Siti» jamoasiga qarshi o‘ynaydigan bo‘ldi.

«Bu ikki teng jamoaning qarama-qarshiligi bo‘ladi. Ikki jamoada ham yuqori saviyadagi futbolchilar to‘p surishadi. «Manchester Siti» — juda kuchli raqib. Ular Chempionlar ligasining yarimfinaliga ilk marta yo‘l olishdi va endi ular katta ishtiyoq bilan harakat qilishadi. Biz finalga chiqishni istasak, diqqatni yo‘qotmagan holda o‘yinlarga tayyorlanishimiz kerak bo‘ladi. Ba'zilar bizning omadimiz kelgani haqida aytishmoqda. Undaylar o‘tgan yili ham «Yuventus»ning tushishi «Real»ga osonlik keltirgani haqida aytishgandi. Lekin bu jamoa bizni turnirdan chiqarib yuborishgandi. Yarimfinalda kuchsiz jamoalar bo‘lmaydi, — deya Butragenoning so‘zlarini keltiradi AS nashri.

Madridliklarning manchesterliklarga qarshi ilk uchrashuvi safarda, 26 aprel kuni bo‘lib o‘tadi. Javob uchrashuvi 4 mayga belgilangan.