Yaponiyada yangi sun'iy yo‘ldoshli aloqa tizimi tashkil etiladi

Yaponiya hukumati sun'iy yo‘ldoshlar vositasida mobil aloqani ta'minlovchi yangi tizim barpo etishga qaror qildi.

"Mazkur tizim kuchli tabiiy ofatlar sababli quruqlikda ishdan chiqqan aloqa stansiyalari va liniyalari o‘rnini bosishi lozim. Ushbu tizim apparatlaridan biri allaqachon fazoda faoliyat yuritmoqda. Yana ikkitasi 2017 yilda uchiriladi. 2023 yilda yana 3ta shunday qurilma yer yaqinida parvoz qila boshlaydi", deb yozilgan Nikkei Asian Review portali xabarida.

"Mitibiki" ("O‘tkazuvchi") nomini olgan yangi tizim 2011 yil martidagi voqealar takrorlanishiga yo‘l qo‘ymaslik maqsadida joriy etiladi. O‘shanda mamlakatning bosh oroli Xonsyu shimoli-sharqida yuz bergan dahshatli zilzila va sunamidan so‘ng 29 ming mobil aloqa stansiyasi va 1,9 mln yerusti telefon liniyalari ishdan chiqqan edi. Bu esa qutqaruv ishlarini tashkil etish va talofat ko‘lamini baholashda qiyinchiliklarni vujudga keltirdi.

Yangi sun'iy yo‘ldoshlar aloqa stansiyasi vazifasini bajarib, butunlay vayron bo‘lgan hududlarda ham mobil aloqadan foydalanish imkonini berishi ko‘zda tutilgan. Uning vositasida uzoq joylardagi kishilarga ma'lumot yetkazish ham mumkin bo‘ladi. Yangi tizim 2018 yilda sinov faoliyatini boshlaydi.