O‘zbekistonlik ikki barmoqda tortilish bo‘yicha jahon rekordini o‘rnatdi

O‘zbekistonlik Jamshid To‘rayev turnikda ikki barmoq yordamida tortilish bo‘yicha Ginnesning jahon rekordini o‘rnatdi, deb xabar qilmoqda Ginness rekordlar sayti. 

37 yoshli o‘zbekistonlik o‘rta barmoqlari yordamida bir daqiqada 19 marta to‘liq tortilishga erishgan. Aslida u 25 marotaba tortilgan, biroq 6 tasi belgilangan me'yorlarga javob bermagani uchun hisobga kiritilmagan. 

Sportchi o‘zining rekordini ro‘yxatga olish uchun topshirgan arizasida aytishicha, u besh yil mobaynida shug‘ullangan. Aytish joizki, Jamshidning mutaxassisligi huquqshunos bo‘lib, Samarqanddagi Suvorov harbiy bilim yurtini ham tamomlagan. 

Ayni vaqtda, o‘zbekistonlik Kiprda istiqomat qiladi va murabbiy-instruktor bo‘lib ishlaydi. 

Shuni ham qayd etish kerakki, ushbu rekord To‘rayev uchun ikkinchi Ginness rekordidir. Turnikda orqacha tortilish bo‘yicha o‘tgan yili may oyida o‘rnatilgan jahon rekordi ham unga tegishlidir. U o‘shanda bir daqiqada 23 marotaba tortilishga muvaffaq bo‘lgan edi.