Portugaliyada erkak selfiga tushish vaqtida 126 yillik haykalni chil-chil qildi

Portugaliyada bir erkak selfiga tushmoqchi bo‘lib, 16-asrda yashagan qirolning 126 yillik haykalini chil-chil qildi, deb xabar bermoqda RIA “Novosti” axborot agentligi.

Erkak Lissabondagi Rosiu temir yo‘l vokzalida o‘rnatilgan portugal qiroli Sebastyan l’ning haykali asosiga chiqqan va ko‘pollik qilib, haykalni turtib, yerga tushirib yuborgan. Bu voqea 3 may yarimtun atrofida sodir bo‘lgan.

Omadsiz fotohavaskor bu qilmishidan so‘ng voqea joyidan yashirinishga harakat qilgan, biroq politsiyachilar uni tutib olganlar. Erkak hibsga olindi, u keyinroq sud oldida javob beradi.

Haykalda qirol Sebastyan l qo‘lida qalqon va qilich ushlab turgan holida tasvirlangan. Haykal vokzal binosiga kiraverishda, arkalar o‘rtasida 1890 yildan beri turgandi.