Putin Kudrinni Iqtisodiy kengashning ishchi guruhiga rahbar etib tayinladi

«Fuqarolik tashabbuslari qo‘mitasi» rahbari, sobiq moliya vaziri Aleksey Kudrin Rossiya prezidenti qoshidagi «Tuzilmaviy islohotlar va barqaror iqtisodiy o‘sish ustivorliklari» nomi ostidagi iqtisodiy kengashning ishchi guruhi rahbari etib tayinlandi. Bu qaror matni huquqiy xabarlar portalida e'lon qilingan.

Ishchi guruh tarkibidan hukumat apparati rahbarining birinchi o‘rinbosari Maksim Akimov, Iqtisodiy taraqqiyot vazirligi rahbari o‘rinbosari Aleksey Vedev, «Sberbank» rahbari German Gref, Moliya vaziri o‘rinbosari Maksim Oreshkin, Rossiya banki raisining birinchi o‘rinbosari Kseniya Yudayeva, Iqtisodiy taraqqiyot vazirligi qoshidagi Butunrossiya tashqi savdo akademiyasining ilmiy-amaliy ishlar bo‘yicha prorektori Pavel Kadochnikov va boshqalar kirishgan.

Ushbu ishchi guruhning asosiy vazifalari iqtisodiy sohadagi dolzarb muammolar bilan shug‘ullanish, tuzilmaviy islohotlar orqali iqtisodiy o‘sishni ta'minlash, Rossiya iqtisodiy rivojlanishi holatini o‘rganib, tahlil qilib, alohida sohalar uchun samaradorlikni ko‘zda tutuvchi takliflar ishlab chiqish va boshqalar hisoblanadi.