Italiyaning "Yuventus" va "Milan" jamoalari Italiya kubogi finali oldidan shaxsan Rim papasining oq fotihasini olishga muvaffaq bo‘lishdi, deb xabar bermoqda Associated Press axborot agentligi.
Pontifik 21 mayda final uchrashuvida to‘qnash keladigan jamoalar o‘yinchilari bilan uchrashuvda ularga sportning bosh qadriyatlari: uyg‘unlik, ishonch va do‘stlikka doimo amal qilishlari kerakligi haqidagi so‘zlar bilan oq yo‘l tiladi.
"Siz sportdagi chempionlarsiz, biroq bundan ham ustunrog‘i, siz hayotdagi chempionlarsiz", deb aytdi Frantsisk.
Rim papasi ashaddiy futbol muxlisi bo‘lib, Argentinaning "San-Lorentso" klubiga muxlislik qiladi. Katolik cherkovining rahbari unga butun dunyo futbolchilari taqdim qilgan futbolkalar kolleksiyasiga ega.
Italiya kubogi finali bugun, 21 mayda Rimdagi Olimpico stadionida bo‘lib o‘tadi.