Erdo‘g‘an YeIning muhojirlik inqirozi bo‘yicha pozitsiyasini tanqid ostiga oldi

Turkiya prezidenti Rajab Toyib Erdo‘g‘an Yevroittifoqning muhojirlik inqirozini nazorat qilish pozitsiyasini tanqid qildi. Bu haqida u  The Guardian'dagi maqolasida ma'lum qilgan.

Erdo‘g‘anning ta'kidlashicha, dunyoning boshqa davlatlariga qaraganda eng ko‘p qochoqlarni qabul qilgan va gumanitar ehtiyojlarga yalpi ichki mahsulotning katta qismini sarflagan Turkiya sayyoradagi eng "saxiy" mamlakatdir.

Uning fikricha, xalqaro hamjamiyat  bu masalani uzoq vaqt bee'tibor qoldirgan va terrorchilarning Yevropa mamlakatlaridagi hujumlaridan keyingina unga diqqatini qaratgan. Agar dunyo jamoatchiligi Suriya bilan bog‘liq mojarolarga ularning dastlabki bosqichlarida aralashganda edi, ko‘plab muammolarni chetlab o‘tishning imkoni bo‘lardi. 

Endi, deb yozadi Erdo‘g‘an, Yevropa  qochoqlar masalasini hal qilish vazifasi bo‘yicha Turkiyaning mas'uliyatini taqsimlashiga to‘g‘ri keladi. Buning uchun u Bryussel va Anqara o‘rtasida mart oyida imzolangan muhojirlik bitimiga muvofiq yuridik mexanizmlarni hamkorlikda ishlab chiqishni taklif qilmoqda.

Bundan tashqari Turkiya rahbari Suriya prezidenti Bashar Asadning rejimini qulatishga chaqirdi. Uning fikricha, bu mamlakatda demokratiyani joriy etishning zarur shartidir.