"Gazprom" O‘zbekiston va Qozog‘istondan olinadigan gaz narxini pasaytirishni kelishib oldi

"Gazprom" 2015 yilda O‘zbekiston va Qozog‘istondan olinadigan gaz narxini pasaytirishni kelishib olgan, deyilmoqda kompaniya hujjatlarida. Bu haqda TASS axborot agentligi xabar bermoqda.

"O‘zbekiston va Qozog‘istondan olinadigan gaz narxini pasaytirishga kelishib olindi", deyilmoqda hujjatda.

"Gazprom"ning ta'kidlashicha, 2015 yilda Turkmanistondan gaz sotib olish hajmi ancha qisqartirilgan. 

Kompaniya rahbari o‘rinbosari Aleksandr Medvedevning yanvarda ma'lum qilganidek, "Gazprom"ning "Turkmangaz" bilan shartnomasi Turkmaniston tomonidan gaz narxi bilan bog‘liq konstruktiv pozitsiya namoyon qilinmagani sababli bekor qilingan. Medvedevning ta'kidlashicha, "Gazprom" Turkmaniston tomonidan o‘zaro manfaatli yechimni topishga istak yo‘qligi sababli hakamlik sudiga da'vo arizasi topshirgan.

Kompaniyadagi manbaning TASS axborot agentligiga avvalroq ma'lum qilishicha, "Gazprom eksport" "Turkmangaz"ni joriy yilning 1 yanvaridan turkman gazini sotib olishni to‘xtatishi haqida xabardor qilgan. Shu bilan bir vaqtda kompaniya 2016 yil 1 yanvardan O‘zbekistondan tabiiy gaz sotib olish hajmini oshirdi. O‘zbek gazini sotib olishni ko‘paytirish bo‘yicha kelishuvga o‘tgan yilning dekabrida erishilgan.  

Agentlik manbasi ma'lumotlariga ko‘ra, 2016 yilda sotib olinadigan o‘zbek gazi hajmi 3,1 mlrd kub metrdan oshishi mumkin. 2015 yilda shuncha hajmdagi gaz Turkmanistondan sotib olingan.